Брифинг за трката: Подгответе се за старт!

Здраво на сите,

Добредојдовте на четвртото издание на Punk's Backyard Ultra, уникатен концепт на атлетска трка создаден од Лазарус Лејк. Позната по својот исцрпувачки тест на издржливост и ментална цврстина, по четврти пат се одржува во Македонија со цел да ги редефинира границите на атлетска издржливост. Со својот возбудлив, но застрашувачки предизвик, овој ултра-маратон, чиј домаќин е бањскиот комплекс Негорски Бањи, а организатор е Здружението ТРЕКС од Скопје помогнато од членови на АК 7ми Ноември Гевгелија, е подготвен да ги привлече најрешителните и најавантуристичките тркачи.

ПРАВИЛА

Punk's Backyard Ultra е како доказ за човечкиот дух и издржливост, во сабота на 17 Октомври во 10 часот ве повикува да ги надминете вашите психо-физички граници. Форматот на трката е навистина едноставен, но уникатно предизвикувачки – се трча круг од 6,7 километри во рок од еден час, а штом ќе измине часот, започнува следниот круг. Трката продолжува додека не остане само еден тркач на нозе - вистински тест за ментална отпорност и физичка издржливост.

Бекјард Ултра Правила

1. ПATEKA: Метрички еквивалент 6,7056 километри со 163м Д+
2. СТАРТУВАЊЕ ОД КОРАЛОТ (ОГРАДА): Учесниците мора секој круг да стартуваат од стартниот корал.
3. СТАРТОВИ: Секој круг започнува точно 1 час по последниот круг. Предупредување се дава 3, 2 и 1 минута пред стартот на секој круг. Сите натпреварувачи мора да започнат со ѕвончето (без доцни стартови = днф)
4. КРУГОВИ: Освен за во тоалет, натпреварувачот не смее да ја напушти патеката додека не се заврши секој круг. Нема не-натпреварувачи на патеката (вклучувајќи ги елиминираните тркачи). Нема лична помош за време на еден круг. Секој круг мора да се заврши во рок од еден час за да се брои... вклучувајќи го и последниот круг.
5. ТАЈМИНГ: Бројот на истрчани кругови ќе се запишува во апликација - задолжително да се каже стартниот број на официјалното лице веднаш при пристигнувањето на целта. 
6. ПОБЕДНИК/РЕЗУЛТАТИ: Победникот е последниот учесник и притоа мора да заврши сам уште еден цел круг. Сите други се технички DNF. Ако ниту еден тркач не може да заврши еден круг повеќе од кој било друг, нема победник.
7. ВРЕМЕНСКИ ЛИМИТ: Трката е отворена без временски ограничувања.

Во стандардните трчачки настани, пејсерите се спротивни на правилата. Бекјард ултрите се поинаков спорт. Секој бекјард е до одреден степен тимски настан, а од вас учесниците се очекува да работите заедно за да му помогнете на секој да го истрча најдолгото можно растојание.

Важи само правилото против примање помош вон стартот или целта, но учесниците можат да споделуваат се што носат еден со друг. Ако еден спортист заборави вода, тие можат да примаат течности што ги носи друг. Ако некој тркач, на пример, сака да „пејса“ други учесници, тоа е сосема прифатливо.

НАЦИОНАЛНО ПРВЕНСТВО ВО БЕКЈАРД

Исто така, во склоп на настанто се одржува Националното првенство во БЕКЈАРД како квалификација за македонската репрезентација на Сателитското светско тимско првенство во 2027. Натпреварот помеѓу земјите е поделен на класи врз основа на искуството на членовите на репрезентацијата. Еднаш годишно, во истовреме низ целиот свет се одржува првенство на национални тимови составени од 15 репрезентативци. Секој е тркач се бодува, така што секој од 15-те репрезентативци е подеднакво важен. Оваа година немаме пријавени тим, но догодина доколку има интерес, во зеднички договор можеме да се организираме да учествуваме.

Најдобро пласираниот македонец/македонка на Панкс Бекјард Ултра 2026 ќе се смета за национален шампион на Македонија во бекјард. А најдобрите 50 национални шампиони (според поминато растојание) добиваат покана за светско индивидуално првенство во Октомври 2025 година во САД.

ЛОКАЦИЈА И СМЕСТУВАЊЕ

https://maps.app.goo.gl/NRusrCBueM6RCA7i8 

Настанот ветува дека ќе биде возбудливо и незаборавно искуство, со примамлива трејл патека низ Велотлон МТБ паркот во близина на Негорци, на 2 км од градот Гевгелија, која е трасирана за да ја тестира издржливоста на тркачите и да ја покаже природната убавина на околината. 

За да пристигнете во бањскиот комплекс следете ги знаците и од автопатот и од регионалниот пат за Негорски бањи. Паркингот е бесплатен, пред самите бањи и на сервисната улица во бањскиот комплекс. Подигнување на стартниот број ќе се врши од 9 часот на стартот-целта во паркот на бањите спроти ресторанот. Стартот на првиот круг е закажан во точно 10 часот на 17 Октомври во Сабота.

Ние ви го препорауваме сместувањето во склоп на бањите со 10% попуст за учесници. https://www.negorskibanji.com.mk/hotels

Секако низ Гевгелија и Негорци има апартмани и други сместувачки капацитети.

ПАТЕКА

Патеката 80% е трасирана МТБ патека по земјен пат, 10% по трева на фудбалски стадион и 10% асфалт. Маркациите се со розеви знаменца и стрелки-знаци поставени на 20 метри метри растојание. Се започнува од паркот пред ресторанот на хотелите и се трча околу стадионот па низ паркингот преку регионалниот пат. Внимателно се преминува регионалниот пат (кој ќе биде цело време обезбедуван од Сообраќајна полиција) и се влегува во Велотлон МТБ паркот каде што е главницата од растојанието на секој круг. Се трча по одлично трасирана 2 метри широка мтб патека, со многу можности за скратување! Затоа оставаме на вашата етика и совест секој круг што ќе го истрчате да изнесува точно 6,7км! По 5+ километри низ Велотлон паркот повторно се преминува регионалниот пат, внимавајте иако сообраќајот ќе биде регуларан цело време од полицијата. И пак се прави еден круг околу стадионот пред да се стигне на целта.

ГПС фајлот е објавен на веб страницата на трката.

Најуспешните тркачи на Backyard Ultra се стремат кон време за одмор од 7 до 15 минути, обидувајќи се да истрчаат 6.706 km за 45 до 53 минути.

6.7km / 163m D+ = 1 КРУГ
40km / 978m D+  = 6 КРУГОВИ
100km / 2,445m D+ = 15 КРУГОВИ
161km / 3,912m D+  = 24 КРУГОВИ
201km / 4,890m D+ = 30 КРУГОВИ

СТАРТНО – ЦЕЛНА РАМНИНА и ЛОГИСТИКА

Во стартно-целната рамнина ќе бидат поставени затворени тенди со вкупна квадратура од 72м2, а внатре столици за секого кои што ќе служат за одмор и рекуперација пред секој нов круг. Таму ќе биде поставена комплетна освежителна станица со вода, кафе, чај, електролити и сокови, овошје, благи и солени ужинки и грицки, леб, ајвар, кашкавал и сирење. Во заеднички договор за кое време да биде послужена на контролната ќе имаме тестенини, пица и топла месна и зеленчукова чорба. 

Но исто така ве замолуваме да си понесете и своја храна и течности кои најмногу ви одговараат како дополна која можете и да ја споделите со другите тркачи - ајде да направиме другарска атмосфера – секој нека донесе на пример домашни колачи, кифлички, џем, слатко, сиренце и било што домашно што ви е по ќејф.  

Исто така, доколку имате, понесете си камперски столчиња, масиче и креветче евентуално (маси и столици ќе има од ресторанот), можеби и ваш шатор ако сакате приватност, ќебе за преку ноќта а обавезно некое чинивче, чаша и прибор за јадење. Земете си и купачи и пешкир за после трката да си ги регенирате мускулите во извонредната лековитата бањска вода (се наплаќа влез во базените). 

Тоалетите од ресторанот на Негорски бањи се достапни за користење за сите учесници (оддалечени 10м од стартот) но исто така додека работи кујната може да се порача храна и пијалоци оттаму.  

ОПРЕМА

Во однос на опремата, ве советуваме да носите летно-есенска трчачка облека (односно за денско и за ноќно трчање), понесете си резерва облека за пресоблекување, два пара патики за менување, не заборавајте челни ламби (резервни батерии или полнач обавезно, има штекери) а користење на планинарски стапчиња не се препорачува. Се разбира земете си лична хигиена, прва помош, фластери, ленти, вазелин, астрофолија и се што вообичаено ви е потребно за еден ултра-маратон. 

За време на трчањето нема задолжителна опрема/облека така што можете да трчате без бидон со вода, без ранче, без мобилен итн. 

ПОМАГАЧИ и ПУБЛИКА

Мотивирајте ги вашите помагачи да напишат транспаренти, да земат навивачки реквизити, да пуштаат музика на звучниче, да се маскираат, да се забавуваат. Советувајте ги да се облечат соодветно.

Ве охрабруваме да дојдете со вашето семејство, донесете ги вашите деца - Негорските бањи имаа одлични услови за играње, растрчување и прошетка по патеката низ природа. Но, најважно да им бидете инспирација за развивање здрави навики и љубов кон спортот.

Би сакале да ве замолиме за посебно внимание на поставената сообраќајна сигнализација на самата клучка кај Негорски бањи бидејќи таму ќе се преминува патот двапати во секој круг во текот на трката. 

Забавувајте се и со голем успех!

За повеќе инфо: punksbackyardultra@gmail.com

или на мобилен, вибер, вацап 071 246 423

Дејан Крле, директор на трката